2012-03-19

沖繩自駕遊 - Day 4 (二)

本篇行程:
Aquagrace Chapel >
殘波燈塔 >
勝連城跡 >
海中道路 >
KING TACOS長田店 >
富久屋 >
那霸美榮橋站 東橫INN

離開琉球村後,我地直去殘波岬觀賞燈塔。殘波岬係沖繩西部,有點接近我地第二天去浮潛既藍洞。揸車途中我地經過好多人影既Aquagrace Chapel,就落車影下個靚靚教堂。

教堂有個落地大玻璃,可以由內部直接望到外面既沙灘同大海。入面擺設簡約舒適,適合唔係教友但又想係教堂行禮既朋友進行結婚儀式。

教堂外面有一個好別緻既涼亭,不過因為太細所以冇櫈仔。

係教堂行完一個圈後就去殘波岬既燈塔,要上燈塔就要先比入場費,再行幾十級樓梯上去最上層,觀賞殘波岬一望無際既景色。不過點解比錢都冇電梯搭既。



由燈塔頂往下望真係腳都軟,不過可以一覽殘波懸崖既景致都十分值得。所有在地上既人仔都變得非常細小。

咁既環境緊係要試下個相機既連相功能啦。


好快我地又去下一個景點 - 勝連城跡。上次去唔到今歸仁城,今次算係補償。

完全係自由參觀,唔使入場費。遠望好似長城,其實係一個頗細小既古蹟。


有英文介紹。不過,英文日本人名真係好難記。


遺跡內有不少奇形怪狀既植物。

由古蹟頂部望下去,可以飽覽 海岸邊小村莊既景致。

古蹟保存得好好,又係冇垃圾。附近有一個遊客中心,內有一個勝連城跡古代模型,可以一窺古城全貌。

之後順路到沖繩有名既海中道路。地點係沖繩東部,用以連接東部外島。特別之處係在路既左右兩邊都係海。


架車仔就係呢幾日陪伴我地既油電混合車,架船型建築物就係海中道路既中途休息站。可能因為唔係假日,成個停車場幾乎任泊。

懷舊紅色郵筒。


成個休息站入面比較吸引係呢個用貝殼做成既美人魚。


之後我地專程揸車到沖繩中部既KING TACOS長田店。其實佢只係其中一間沖繩墨西哥快餐連鎖店,因為台灣網友很多都讚好,加上符合價廉物美既原則,同埋主打菜式係以墨西哥肉醬加上日本珍珠米既配搭,所以就算快到晚飯時間同埋路程稍遠,都要去試一試。

店外店內,都十分"地道連鎖店",就好似香港既茶餐廳。而且由點餐、取餐、到收拾,都係全自助,感覺就好似返回大學時代既飯堂一樣。下圖個位仁兄示範自助倒水。



店內大多是年輕人。在等食時睇到隔離枱個碟墨西哥漢堡,比我隻手掌還大,心諗唔好食都一定抵食。

呢碟就係沖繩Taco Rice!賣相比較差,只係因為影相之前我太心急,已經將配料同飯撈埋一齊。Taco Rice 既飯係日本珍珠米,上面既配料係墨西哥肉醬、芝士條、生菜絲、同埋蕃茄片。墨西哥肉醬內有小茴香,非常惹味。如果你唔知小茴香係乜香料,可以諗下燒烤肉類用既孜然粉既味道。

我地將所有配料同米飯混和後,再加上少許辣椒醬,簡直食到停唔到手,辣椒醬既刺激,小茴香肉醬既惹味,芝士既香滑,生菜蕃茄既新鮮加上日本米既粘口,令我呢個鄉下人大開眼界,而價錢只不過係六十幾港紙。

如果問我對呢份"下午茶"有什麼不滿,可能係墨西哥肉醬內冇墨西哥豆(個人喜好),同埋飲品Dr. Pepper唔好飲。

臨走時我用日文同樓面個呀姐講"好食",佢用不可思議既眼神對我笑笑。我明既,就好似你係香港麥當奴同個賣包呀姐講"好好食呀",佢一係認為你係傻,一係認定你係饑民。
食完係附近一間書店行一陣,跟往就駕車前往首里城。其實我地只不過想係首里城門口影一影相,叫做到此一遊,同埋食晚飯前幫助消化。點知去到已經七點幾,首里城已經關門,個保安更加唔凖我地去個正門,真係"門都沒有"。

唯有轉去食晚飯,目的地係首里城附近既富久屋。富久屋係一間很有平民風味既沖繩傳統料理店,地點幾難找,位置係住宅區,只有經由一條好窄既小路到達。而且停車場既地方唔大,我去到既時候仲要泊錯左人地個位,要揸出來再泊過,對我呢種泊車"神"手黎講簡直苦不堪言。

不過排除萬難才到達目的地既喜悅,又確係好難形容(只針對駕車新手而言)。

室內裝潢很古色古香,全以不同深淺既木制家具建成。簡樸得來很有家的感覺。圖中帶上圍裙既人係老闆。


由我地既座位往外望,古意盎然。

成個定食最最好食係右上面個兩小碟: 好似豆腐既年糕同埋紅芋肉餅!我起初仲以為右上角個碟係豆腐,係老闆面前讚下佢好好食,老闆好開心咁同我地講其實係特制既豆腐年糕,怪唔知佢又滑又煙韌啦。佢又介紹個炸肉餅既作法,係用冬菇粒,牛肉碎,紅芋蓉,搓成一團後炸成。真係好好食,可惜太細碟啦,同埋唔可以分開點,一定要跟餐。

又係飽到不行了,頂住個大肚腩揸車到那霸美榮橋站 東橫INN check in。咁又一日啦。聽日要去睇咁大個人第一次睇既鐘乳石。




上篇︰沖繩自駕遊 - Day 4 (一)
下篇︰沖繩自駕遊 - Day 5 (一)

沒有留言:

張貼留言