大圍美食 - 屋子咖啡

大圍火車站附近真的有很多平民美食，尤其是在積乜街一帶的食肆，價錢合理，環境平民，性價比高。自己在大圍住了差不多兩年，但真的沒有很多機會去那裡走走逛逛。

今天專程去了積乜街的屋子咖啡，全因為想嚐嚐深夜食堂裏的貓丼(飯)。貓丼其實是一道平凡到不得了的菜，只是鰹魚片(更正︰應為木魚花才是)加日本米飯，再淋上一點醬油而成。

店內裝潢簡約，有幾張舊日日本的海報作點綴。

店內的樓底有二層高，空間感不俗，但樓面面積不大，只有大約七八張桌子，人多的話要在店內等一下。等的時候可以參觀他們的小商品。

菜單的選擇不多，很好，這樣才會專注做好幾種菜式。

最後我轉軚，選擇了定食，因為有沙律，前菜，主菜，丼，加上飲品，五十蚊有找！

雞肉炸得很香口，也有肉汁，絶不馬虎，唯一缺點略嫌炸粉太多。飯上的配料很開胃，前菜是我最愛帶子裙邊，當然一件不留。

最最最喜歡那個特小量杯！是用來盛蜜糖用的，加落熱蘋果茶內很清甜。

後來一對日本夫婦帶同兩個小朋友到來，他們利用店內的食物相片來點菜。整個屋子內的感覺就更加日本了。

本想在這種正氣的地方看看京極夏彥的幽談，但為免阻礙其他客人還是早點離開吧。

一定會再來點我的貓丼。

各位追求份量和超好味日食的可以不去，因為不想和你們爭位。

環球金融，地方車仔

今日係中環散步時，忽然發現一架銀行專用車停泊係中環街市附近。

架車仔幾得意，究竟係銀行宣傳車？定係解款車？又或者係…員工專用轉駁車？但係點解個外型咁面善？後面仲有一大班中環人好有禮貌好整齊咁排隊？

睇耐少少，原來係富貴雪糕車！個贊助費真係抵，因為街上好多人都會留意架咁面善既雪糕車，就算冇播放耳熟能詳既洗腦式音樂(其實，真係好吵耳同難聽)我地都認得出。

令一奇景係不少人(女士居多)都躲在唯一的陰影下排隊，隊頭的一個箭步沖到車側買雪糕，隊尾的就要忍受在酷熱天氣下中環街市公厠的惡臭，以對比最後食到富貴軟雪糕的快樂，值得值得。

話時話，好耐都冇見以前佢個口號︰環球金融，地方智慧。原來獅子行已經悄悄改口號，可能因為環球唔係好掂，地方又冇乜面吧。

突發︰香港島中西區七一半天遊

今天，我地嘗試由銅鑼灣維多利亞公園步行到金鐘，參觀新政府總部，有機會再到西環食糖水，打算用三四小時完成。

下午天氣好好，少雲，天朗氣清，和風微拂，我地三點多已經到達維園。好多行友已經出發，但也有很多行友係維園等。三十幾度個個企定定係到等，講真，好難頂，烈日晒到個頭出煙。但係冇人抱怨，冇人投訴，冇人打尖，小朋友冇發脾氣。


跟住係電車路走走停停，二個多小時後依然未走到祟光，大家都好有秩序。這也是一個好經驗，你有幾多機會可以沿電車路走行？


一路上有不少途人係天橋上表示支持。

最後到達灣仔時，已經七點幾。正呀，過多陣仲有歌舞昇平掩人耳目合家歡煙花睇。又有好多人去附近餐廳醫肚後再行過。




今次係第二次，對上果次已經係八年前。係呢個經濟環境不錯，失業率咁底既情況下，都有咁多行友，你估咁易呀，我放假去按摩睇戲買野嘆冷氣陪屋企人唔好？！


好多合理既要求，人類既進步，都係由下而上去爭取，唔係由上而下既施捨。

呃人唔緊要，但係你唔好以為我地會話︰咁呀，哎呀，下次少心啦。然後當冇事發生，我地唔係傻仔。

所以，趁仲可以行，仲可以寫，做多點，以後可能未必再有咁既機會。

好很感動，多謝大家！