台中自由行 (台中, 清境，日月潭掃街自然遊) - Day 1

本篇行程︰

台中機場 >
奇異果快捷旅店 >
一中商圈 >
勤美誠品 >
逢甲夜市 >
回旅店休息


今次選乘的是香港快運，屬於午機去午機返的航次，到達台中機場大約是下午一時多。台中機場是軍民兩用機場，你有很大機會可以在跑道看到一些戰機。由於我們已經在網上辦妥了入台簽證，由下機到過關只需約十數分鐘。過了關第一時間是到洗手間拜訪一下，整潔程度嘛，沒有地方是可以和強國媲美的。而第二時間是到機場內唯一的銀行找換台幣，真的想不到台幣兌港幣已經升了那麼多，看來這次預算要再鬆一點。由於抱着"出市區的兌換價可能會好一點"的心態，所以只是兌換了大概夠兩三天用的旅費。

出了機場人生路不熟，那打的是無可避免了。的士大佬真的好像黑道大佬，不苟言笑，我起初有點擔心，因為小弟手無縛雞之力，幾可肯定一下子就被KO，如果的士大佬送我去賣身那怎麼辦？但大佬一下車就幫我們拿行李到車尾箱，上車後還很溫柔的說︰"兩位請用安全帶，因為是台灣法律規定的呵~" (那個呵字是重點，它提醒了我定在身處台灣了！)，這才寛心下來。

一路上大佬都開得很快，在窗外看到的景色令我想起︰廣州，而且是廣州的郊外。

在我們住的台中市奇異果快捷旅店附近，有一家太陽餅專賣店，名字有點不好意頭... 根據中國神話，九個太陽最終全被射下。不過，他們的太陽餅都幾好食。

在酒店安頓後，要出發醫肚了！因為中午的飛機沒有餐飲，所以直到下午還是空着肚子，不過這正是我們的目的。空肚當然是為了去台中"掃街" (掃街上的小食)！

第一個目的地是一中商圈，在途中先經過台中公園，好一個景色怡人的地方。

台中自由行 (台中, 清境，日月潭掃街自然遊) - 準備

自己對台灣很有好感，不單是因為地道小吃，還有華人社會中幸存的人文風情︰那種對文字書本的喜愛(不只是香港人愛看的金融心理工具書)，那種人與人之間的基本禮貌尊重，那種獨特的說話方式(我認！我是形容台灣女子那種要你命的說話和語氣。)，都十分之吸引！

台北已經去了數次，今趟不如發掘一些新地方去感受一下吧。剛好台中日月潭的九族文化村有One Piece的展覽，而且二月更有櫻花祭，好，今次就去台中！不但可以到台中市吃吃地道小食，也可以順路到一些台中的自然景點輕鬆一下，吸多點久違了的新鮮空氣。

多謝到過台中的同事給我很多有用的資料和書本，其中一位來自台中的同事更向我推介了很多必食小吃，大大的豐富了整個行程。

不過最煩人的都是交通，因為景點間比較遠，如要五天內走遍那麼多地方真的要多點時間安排交通。幸好南投客運有不少路線可以到達我們的目的地，如大家有需要的話可以到以下網站查看。
http://www.ntbus.com.tw/index.htm

行程概要︰
台中市 >
清境農場 >
日月潭 >
九族文化村 >
台中市

食︰
一中豪大雞排
大腸包小腸
臭豆腐
羊奶雪條
火煱(今次不夠時間去，好可惜！)
邵族菜

看︰
羊
湖
山
草
日出
溫柔鄉 :)


下篇︰台中自由行 (台中, 清境，日月潭掃街自然遊) - Day 1

深夜食堂

我覺得，旅行同睇書非常想似，都是一種人生經歷，分別係你自己親自去看、去嗅、去聽，以及經別人的照片、文字，去感受、想像，然後繪畫出完全屬於自己的經歷。

現在才寫深夜食堂，可能有點遲，但它的故事真很吸引喜歡尋常百姓地道口味的我。

每一篇故事都有一種很普通的食物作為主題，再帶出一個十分尋常百姓眾生的小故事。但由於食堂營業時間為深夜十二時至早上七時，所以來的客人都有點"不尋常"。食物有時很簡單，甚至簡單得有點過分，例如，一條魚肉腸，一客牛油撈飯。但每一次看的時候，總會有"我也想試一口，不知味道如何"的念頭。

除了賣食物，也賣人情味。客人很多是社會上有點邊緣的人物，例如人妖、黑道中人、脫衣舞孃、鴨(不是食材)、演員，他們都在食堂中訴說他們的故事。往往人最簡單的要求，就只是食，和人之間的感情。食物可以裹腹，可以品嚐，也可以勾起回憶。人情回憶人生經歷很多是苦，但往後可以回甘。

看來我們其實都是來自一個民以食為天的民族。

暫時最喜歡的故事是聖誕節平安夜，一眾互不相干的食客分享一大份螃蟹，眾人皆無言，因為大家都忙着食螃蟹，但眾人又仿似來自一個大家庭。

本城人行色匆匆，食客待應老闆沒有眼神交流，更不用說語言交流了。而食物，是為了拍照用，多過為食用。而回憶一般來說都係短暫，因為很快facebook內的故事已經改頭換面。

請各位品嚐一下吧，有啤酒會更好。

沖繩自駕遊 - Day 6

本篇行程︰
Antoshimo麵包工房 >
牧志第一市場 >
壼屋通 >
沖繩國際機場


今朝一早早餐都唔食，要留肚食Antoshimo麵包工房好出名既麵包。尋幽探秘搵好野食永遠係最好既旅程之一。


用iphone GPS搵路好方便。沿途隨影。

求其一間食肆都好想入去試下。

十點十五分已經到達Antoshimo麵包工房。仲未開門，先到附近行下。

沖繩自駕遊 - Day 5 (二)

本篇行程:
DFS還車 ->
國際通 ->
石垣牛守礼


過左咁多日既揸車生涯，今日終於可以解脫。由初抵步時好想日日揸，到每日揸至少三小時車，每晚返酒店都會疲倦到可以立即睡著，今日我可以坐人地架車啦(那霸市單軌電車)。由於今晚行程全在國際通，所以我地選擇左係國際通附近既DFS Galleria(免稅店)還車。

還車前先要入滿車內既油缸，所以我地先前往附近既油站。理所當然，今日又有趣事發生。首先我係最右線看見油站係最左線，因為時間緊迫我要停低架車再連過三條行車線才可以進入油站，而整條行車道也因我而停頓左…十秒鐘。跟住入到油站，我記得熄車，但我唔記得拉手制，差點撞到了那個不幸既油站服務員… =_=。

好，入滿油都只不過係四百幾港元，真係好平。去到DFS後，我地搵左好耐都搵唔到OTS車站，亦搵唔到指示牌。後來落車問人才知道OTS車站是在DFS地庫停車場，不知道其他人有冇相同經歷。

還車手續非常簡單，之後我地係DFS參觀，內裏有很多名店，裝潢格調亦高，但價錢相比香港並不便宜。不過驚喜既地方係我地臨走時竟然收到商場送的一份小禮物。可能係因為當時我地手挽着很多東西，商場接待員很細心地將一個環保購物袋送給我，令冇買野"運吉"既我地有些少唔好意思。


走出DFS後，我地步行到Omoromachi單軌車站，買了二張One Day Pass。沖繩可愛既地方係很多建築簡約得來也很別緻，但又不脫一種東南亞味。這個單軌車站，望落去似唔似曼谷市空中鐵路？

走進單軌車內，你又會覺自己身在日本，因為地方很整潔。仲可以見到電車司機如何揸車。請留意相中門上既標示，車廂內係唔可以講手提電話。

沖繩自駕遊 - Day 5 (一)

本篇行程:
玉泉洞 ->
中本鮮魚店 ->
平和祈念公園 ->
波上宫

經過咁多日係沖繩中北部既行程，今日主力留在南部同那霸市。

今日係咁多日以來天氣最差既一日，簡直係由早上落雨落到夜晚。不過好彩今朝參觀的地方是沖繩南部一個室內景點 - 玉泉洞。玉泉洞位於沖繩世界文化王國‧玉泉洞，為沖繩境內最大的主題公園。但由於園內其他園區同我地前幾日去既地方好相似，所以今日都係集中到玉泉洞參觀。

樂園內的指示牌內容係唔係熟口熟面呢？又琉球王國又熱帶水果園，我諗內容都係差不多。

園內有兩隻用盆栽砌成既石敢當歡迎你。

玉泉洞係日本第二大鐘乳石洞，第一眼已經感受到佢既巨大。場內不時有不同顏色既燈光投射在洞壁上，不同時間影相會有不同視覺效果。洞內一些形狀奇特，姿態曖昧既鐘乳石，都被冠上不同名字。

沖繩自駕遊 - Day 4 (二)

本篇行程:
Aquagrace Chapel >
殘波燈塔 >
勝連城跡 >
海中道路 >
KING TACOS長田店 >
富久屋 >
那霸美榮橋站 東橫INN

離開琉球村後，我地直去殘波岬觀賞燈塔。殘波岬係沖繩西部，有點接近我地第二天去浮潛既藍洞。揸車途中我地經過好多人影既Aquagrace Chapel，就落車影下個靚靚教堂。

教堂有個落地大玻璃，可以由內部直接望到外面既沙灘同大海。入面擺設簡約舒適，適合唔係教友但又想係教堂行禮既朋友進行結婚儀式。

教堂外面有一個好別緻既涼亭，不過因為太細所以冇櫈仔。

係教堂行完一個圈後就去殘波岬既燈塔，要上燈塔就要先比入場費，再行幾十級樓梯上去最上層，觀賞殘波岬一望無際既景色。不過點解比錢都冇電梯搭既。

沖繩自駕遊 - Day 4 (一)

本篇行程:
熱帶果園 >
萬座毛 >
御果子御殿本店 >
元袓海葡萄料理 >
琉球村

今日行程好似好多不過每一個景點都唔使太多時間，都係以輕鬆為主。食完個酒店早餐就check out，離開那令人舒適性價比超高既名護Super Hotel。每日我地都好守規矩咁只係攞一杯Blue Seal雪糕咋，而唯一既遺憾係冇試到佢個溫泉浴場。

由今天起我地會由北玩到南，第一站係沖繩熱帶果園。開車時天氣晴朗，真希望每天都係咁。

一路揸車一路食剩低既巨峰提子，不過十分鐘就到達熱帶果園。一如所料，又係有好多學生，我開始懷疑佢地係唔係走堂出黎玩。

見佢好似冇人查入場券就自己行左入去。首先看到大量巨型食人花，會降下來咬住你個頭。(講笑，其實唔知係什麼品種，總之就係大。你唔係以為佢真係會郁呀嘛。)

四周有很多這類石敢當擺設，都幾生動。

生到上二樓既巨大火龍果。唔，如果係芒果會更好。