2012-03-30

沖繩自駕遊 - Day 5 (二)

本篇行程:
DFS還車 ->
國際通 ->
石垣牛守礼


過左咁多日既揸車生涯,今日終於可以解脫。由初抵步時好想日日揸,到每日揸至少三小時車,每晚返酒店都會疲倦到可以立即睡著,今日我可以坐人地架車啦(那霸市單軌電車)。由於今晚行程全在國際通,所以我地選擇左係國際通附近既DFS Galleria(免稅店)還車。

還車前先要入滿車內既油缸,所以我地先前往附近既油站。理所當然,今日又有趣事發生。首先我係最右線看見油站係最左線,因為時間緊迫我要停低架車再連過三條行車線才可以進入油站,而整條行車道也因我而停頓左…十秒鐘。跟住入到油站,我記得熄車,但我唔記得拉手制,差點撞到了那個不幸既油站服務員… =_=。

好,入滿油都只不過係四百幾港元,真係好平。去到DFS後,我地搵左好耐都搵唔到OTS車站,亦搵唔到指示牌。後來落車問人才知道OTS車站是在DFS地庫停車場,不知道其他人有冇相同經歷。

還車手續非常簡單,之後我地係DFS參觀,內裏有很多名店,裝潢格調亦高,但價錢相比香港並不便宜。不過驚喜既地方係我地臨走時竟然收到商場送的一份小禮物。可能係因為當時我地手挽着很多東西,商場接待員很細心地將一個環保購物袋送給我,令冇買野"運吉"既我地有些少唔好意思。


走出DFS後,我地步行到Omoromachi單軌車站,買了二張One Day Pass。沖繩可愛既地方係很多建築簡約得來也很別緻,但又不脫一種東南亞味。這個單軌車站,望落去似唔似曼谷市空中鐵路?


走進單軌車內,你又會覺自己身在日本,因為地方很整潔。仲可以見到電車司機如何揸車。請留意相中門上既標示,車廂內係唔可以講手提電話。


2012-03-24

沖繩自駕遊 - Day 5 (一)

本篇行程:
玉泉洞 ->
中本鮮魚店 ->
平和祈念公園 ->
波上宫

經過咁多日係沖繩中北部既行程,今日主力留在南部同那霸市。

今日係咁多日以來天氣最差既一日,簡直係由早上落雨落到夜晚。不過好彩今朝參觀的地方是沖繩南部一個室內景點 - 玉泉洞。玉泉洞位於沖繩世界文化王國‧玉泉洞,為沖繩境內最大的主題公園。但由於園內其他園區同我地前幾日去既地方好相似,所以今日都係集中到玉泉洞參觀。


樂園內的指示牌內容係唔係熟口熟面呢?又琉球王國又熱帶水果園,我諗內容都係差不多。


園內有兩隻用盆栽砌成既石敢當歡迎你。


玉泉洞係日本第二大鐘乳石洞,第一眼已經感受到佢既巨大。場內不時有不同顏色既燈光投射在洞壁上,不同時間影相會有不同視覺效果。洞內一些形狀奇特,姿態曖昧既鐘乳石,都被冠上不同名字。

2012-03-19

沖繩自駕遊 - Day 4 (二)

本篇行程:
Aquagrace Chapel >
殘波燈塔 >
勝連城跡 >
海中道路 >
KING TACOS長田店 >
富久屋 >
那霸美榮橋站 東橫INN

離開琉球村後,我地直去殘波岬觀賞燈塔。殘波岬係沖繩西部,有點接近我地第二天去浮潛既藍洞。揸車途中我地經過好多人影既Aquagrace Chapel,就落車影下個靚靚教堂。

教堂有個落地大玻璃,可以由內部直接望到外面既沙灘同大海。入面擺設簡約舒適,適合唔係教友但又想係教堂行禮既朋友進行結婚儀式。

教堂外面有一個好別緻既涼亭,不過因為太細所以冇櫈仔。

係教堂行完一個圈後就去殘波岬既燈塔,要上燈塔就要先比入場費,再行幾十級樓梯上去最上層,觀賞殘波岬一望無際既景色。不過點解比錢都冇電梯搭既。

2012-03-16

沖繩自駕遊 - Day 4 (一)

本篇行程:
熱帶果園 >
萬座毛 >
御果子御殿本店 >
元袓海葡萄料理 >
琉球村

今日行程好似好多不過每一個景點都唔使太多時間,都係以輕鬆為主。食完個酒店早餐就check out,離開那令人舒適性價比超高既名護Super Hotel。每日我地都好守規矩咁只係攞一杯Blue Seal雪糕咋,而唯一既遺憾係冇試到佢個溫泉浴場。

由今天起我地會由北玩到南,第一站係沖繩熱帶果園。開車時天氣晴朗,真希望每天都係咁。

一路揸車一路食剩低既巨峰提子,不過十分鐘就到達熱帶果園。一如所料,又係有好多學生,我開始懷疑佢地係唔係走堂出黎玩。


見佢好似冇人查入場券就自己行左入去。首先看到大量巨型食人花,會降下來咬住你個頭。(講笑,其實唔知係什麼品種,總之就係大。你唔係以為佢真係會郁呀嘛。)

四周有很多這類石敢當擺設,都幾生動。


生到上二樓既巨大火龍果。唔,如果係芒果會更好。


2012-03-05

沖繩自駕遊 - Day 3 (二)

本篇行程:
岸本食堂 >
海中展望塔 >
許田道の駅 >
古宇利大橋 >
うらの茶屋 >
今歸仁城跡 >
我那霸燒肉店

走出岸本食堂,食飽飽緊係要走走,於是我地係附近閒逛。沖繩比我既感覺似係日本,泰國同中國既混合。佢地有日本人既軟件 - 整潔,有禮,一絲不苟; 那些陽光與海灘又似係屬於泰國布吉同蘇梅; 而那獨特的沖繩料理和傳統日本菜色有點不同,反而很有中國菜的影子,可能是她比較受中國文化影響較深吧。

如果不是那整潔的街道同埋生滋堂,我會以為自己身在布吉。


就算不是遊客區,很多地方也有這些有趣的坐椅給遊人影相。例如這一條半起肉的吞拿魚。


再行下,我又以為去左南丫島。做人做魚都要講下條命生成點,好彩既就係水族館度歎下世界,日日無所事飯來張口糞來也張口; 唔好彩既就比人剝皮拆肉仲要遊街示眾。唔知店主係唔係叫呀武?


拋開那食飽飯無事做既感慨,快快去下一個目的地: 海中展望塔。其實好多景點包括海中展望塔,萬座毛,御菓子御殿本店都係西部公路 - 國道58號北面,所以比較好既安排係一日內從西部公路南走到北,停停走走咁睇晒所有地方。不過因為我地擔心明天玩不完所有地方,所以趁有時間先去比較近北方既海中展望塔吧!

2012-03-04

沖繩自駕遊 - Day 3 (一)


本篇行程:
酒店早餐 >
美麗海水族館 >
手打ちそば きしもと食堂(岸本食堂)

今天早上行程好簡單,就係到訪不論外地或本地遊客都好喜歡既沖繩美麗海水族館!一早七點幾起身,由房間望出去的名護市,交通已經開始繁忙。


天氣都不錯。出發前醫醫肚。




早餐比上一間酒店多些選擇,而且早餐時段所有飲品販賣機都係免費既,包括果汁咖啡朱古力。



酒店附近有唔少野貓。


好,出發!一路上都冇塞車,好舒服咁揸左半個鐘就到達水族館。

魚形路標教你點去。


水族館內有好多泊位,唔使爭。其實水族館區內有好多其他類型既展覽館同公園,不過因為時間關係只好專注遊水族館吧。

2012-03-03

沖繩自駕遊 - Day 2 (二)

本篇行程:
美國村 >
グルメ回転寿司 >
Nathan's Burger >
名護Super Hotel >
Jusco內餐廳

話說我地由漁港揸車去沖繩美國村,一路都落緊雨,又肚餓,又塞車,只係想快快到美國村食野,同埋諗下點改行程。中途提心吊膽驚架車會突然死火。

好好彩一入到美國村就揾到我地既午餐目的地グルメ回転寿司市場美浜店,只不過而家變左下午茶。我地一停車就有個人輕敲我地車門,我心諗唔通我泊錯地方要比錢?原來係OTS職員!佢地upgrade左架車比我地,仲有英文GPS!不過比我揀我想要返架cube仔,得意又易泊。

係油電混合引擎Honda!個panel型過之前個部好多!不過車身長少少,感覺上難揸少少。


多謝完個OTS員工後我地立即衝入グルメ回転寿司醫下肚。因為已經係下午三點幾所以冇乜人,我地隨便攞左幾碟食兩食覺得唔對路,魚生好似唔係幾新鮮,同埋紫菜有少少淋,可能係因為唔係午飯時間所以選擇唔多同埋唔太新鮮,香港既元氣好似仲好食,可惜可惜。

賣相好但係淋左既炸蝦。

求其食完諗住行下美國村,點知鬼死咁大雨,冇法唯有入去商場避下雨。個室內商場好多手信舖同埋美式食肆商店,仲有幾多美軍家眷係入面行街街。不過其實冇乜野行同好食。

特大漢堡坐位。

個肚都唔係咁滿足,好,決定趁細雨出去揾有名既Nathan's Burger。因為美國村都唔細,加上落雨,所以都行左幾多寃枉路先揾到。落單完後,店主問我們是從那裏來的。

2012-03-02

沖繩自駕遊 - Day 2 (一)

本篇行程:
酒店早餐 >
藍洞浮潛 >
美國村


今天主打行程係藍洞浮潛!藍洞是岩石在海中形成的一個洞,因為獨特的結構令洞內呈現一種獨特的藍色,尤其是洞某處會反射出一種獨特的青光,令人以為水中有其他光源。睇旅遊書話全世界只有數個,一個在意大利,另一個就在沖繩。今日已經約了潛水教練Aoki san十時半係前兼久漁港集合

前兼久漁港係沖繩中西部,那霸市係南部,距離好似幾遠,所以都係早點起身揸車上高速公路(要付費的),應該可以係一小時左右到達。

一早起身睇下天氣網有乜update先。


這一刻個心灰左,希望唔好落雨啦!快快食個酒店簡單早餐然後check out出發!因為第一次上highway心情緊張又興奮。


入個mapcode落GPS再揀行highway後起錨。一路揸都尚算順利,而且習慣了那個日文GPS的運作。這裏的高速公路是要先在IC入口處取票,再在出口IC處把票交工作人員分段收費。出發前好多人同旅遊書都話日本人好守法,唔會係路上超速。highway的時速限制係80公里,不過我細膽,諗住頂多七十幾好啦,點知上到去無論大車細車係咁係我右邊過,唔係掛我踩到八十幾都唔夠佢地快,我睇下鏡只係見到一架車同我一樣咁慢係我後面,諗住都好有一個守法既日本人,點知睇佢架車都係OTS租車來的=_=

因為揸快左十點左右就到左目的地。教練當然未到所以我地買杯茶飲睇下風景先。罐茶幾好飲,所以後來再encore。