2012-03-30

沖繩自駕遊 - Day 5 (二)

本篇行程:
DFS還車 ->
國際通 ->
石垣牛守礼


過左咁多日既揸車生涯,今日終於可以解脫。由初抵步時好想日日揸,到每日揸至少三小時車,每晚返酒店都會疲倦到可以立即睡著,今日我可以坐人地架車啦(那霸市單軌電車)。由於今晚行程全在國際通,所以我地選擇左係國際通附近既DFS Galleria(免稅店)還車。

還車前先要入滿車內既油缸,所以我地先前往附近既油站。理所當然,今日又有趣事發生。首先我係最右線看見油站係最左線,因為時間緊迫我要停低架車再連過三條行車線才可以進入油站,而整條行車道也因我而停頓左…十秒鐘。跟住入到油站,我記得熄車,但我唔記得拉手制,差點撞到了那個不幸既油站服務員… =_=。

好,入滿油都只不過係四百幾港元,真係好平。去到DFS後,我地搵左好耐都搵唔到OTS車站,亦搵唔到指示牌。後來落車問人才知道OTS車站是在DFS地庫停車場,不知道其他人有冇相同經歷。

還車手續非常簡單,之後我地係DFS參觀,內裏有很多名店,裝潢格調亦高,但價錢相比香港並不便宜。不過驚喜既地方係我地臨走時竟然收到商場送的一份小禮物。可能係因為當時我地手挽着很多東西,商場接待員很細心地將一個環保購物袋送給我,令冇買野"運吉"既我地有些少唔好意思。


走出DFS後,我地步行到Omoromachi單軌車站,買了二張One Day Pass。沖繩可愛既地方係很多建築簡約得來也很別緻,但又不脫一種東南亞味。這個單軌車站,望落去似唔似曼谷市空中鐵路?


走進單軌車內,你又會覺自己身在日本,因為地方很整潔。仲可以見到電車司機如何揸車。請留意相中門上既標示,車廂內係唔可以講手提電話。




好快就到了県庁前站,再行多兩步就到國際通。那裹是有名既手信街,不論是遊客還是本地年輕人都喜歡到這條街漫遊。

這間雪鹽菓房專賣沖繩其中一種特產菓子︰雪鹽餅。是一種帶咸味既餅乾。


國際通上一些有特色既商店。好大隻既石敢當招財貓,招我地這些財神入國際通。


有名既沖繩苦瓜長椅。加送鐵拳浪子矢吹丈。


其實每一間手信店都係賣差唔多既手信,價錢唔會相差太遠,可以選擇最後一天一次過購買。而且同一間品牌商店在國際通有不同分店,所以唔使擔心要走回頭路才可以買到心頭好。

不過根據我觀察平和通既手信商店可能會平一點點。


鹽係沖繩其中一種特產(佢真係有好多特產…),其中鹽屋出售多種唔同味道既鹽。冇錯,係唔同味既鹽。有黑椒味、香草味、咖哩味、海澡味等。想深一層,只不過係將不同調味料同鹽混合出售。但係日本人就有本事將平凡包裝成不平凡,例如佢地無限量供應迷你飯糰,比你"試食"唔同味道既鹽。真係食下食下又幾好食。

鹽屋另一種有名食物係鹽味雪糕。不過真係好咸,建議一杯雪糕兩人分就夠。

真係烤麵包都烤得有型過人。


雖然係沖繩第一大街,不過依然很街坊。小朋友隨便係商店門口玩貓貓。

不過最吸引我既,依然係波布蛇箱。佢地既T-shirt設計很多是用彩色線繪出不同圖案,例如魚、鳥、樹、美女等,真係好吸引好有藝術氣息。我當然買了一件美女圖啦!

走到累了我地去石垣牛守礼食晚餐。佢既吸引之處係用炭爐來烤肉。

套餐包了下圖所有東西,有蔬菜、牛肉、豬肉、海葡萄、水雲、三枚肉等等。不過由於店內有很多港人而很少本地人,經驗告訴我這不是一個好兆頭。而且本店又位處遊客區,所以價錢並不便宜。

食物質素嘛,我還是比較喜歡"燒肉乃我肚腩"多點。不過對於一個肚餓既人來講,都係冇野可以留低。

喝一口沖繩Orion啤酒,I will call it a day。

明天,係我地在沖繩最後一天。一定要係窮人原則下食到盡興!


上篇︰沖繩自駕遊 - Day 5 (一)
下篇︰沖繩自駕遊 - Day 6

2 則留言:

  1. 請問還車雖否預约?是否任何一處OTS車站都可?你是去到冲繩才租車還是预先在網上租呢?請指教!

    回覆刪除
  2. 希望現在回答不太遲吧。
    我是在網上先訂的,應該任何一處OTS租車站都可以。

    回覆刪除