沖繩自駕遊 - Day 1

行程:
那霸國際機場 >
機場1F TISCO租電話 >
機場OTS取車 >
那霸新都心Omoromachi 東橫INN >
Naha Main Place >
通堂拉麵

第一天一早就到香港機場坐香港快運直達沖繩國際機場。香港快運D機有驚喜wor！估唔到係椅背到有電影睇，仲可以睇到Hangover 2。食個不過不失既飛機餐頂下肚先。

去沖繩之前已經找了一位懂英語的浮潛教練帶我們到藍洞，教練很貼心的告訴我們可以在沖繩機場借用iphone(真係借，唔使錢的！)，所以一落機我們便衝去旅遊局的櫃檯，搶借了一部iphone，沒多久我們後面開始有其他人排隊了。而且好像每日是有限額的，所以最好一落機便去借。想不到後來這部iphone真的救了我們呢。除了iphone，一定要記得拿地圖同旅遊小册子！因為內裏除左有各大景點的map code(GPS用)外，仲有好多食肆優惠。

(2012更新︰借用iphone服務已經係今年春停止，相當可惜…)

由於一早就在OTS的網站上訂了今次行程的車，所以我們可以坐OTS安排的巴士由機場直逹OTS機場租車站。車上很多都是來租車的港人，也有很多小孩子，看來沖繩是一個合家歡的好地方。

由於預約的關係，我們很快就辦完租車手續，但別急，OTS機場租車站內可以用優惠價買美麗海水族館和其他景點的門票，我們選擇了美麗海水族館、琉球村(敗筆...)同埋熱帶果園。

好啦！到了緊張時刻！將會陪我們六天的車會是什麼顏色呢？

都幾靚仔呀。不過，點解個GPS係日文既?!?!我想換架有英文GPS既佢又話冇哂，工作人員示範左兩次我都唔係好明，算啦，頂硬上！

題外話，暫時我遇到的人英文水平都不差，可能因為這裡是旅客區而且又有美軍駐守有關。

走到出路上已經是5點幾近黃昏，因為在香港那個車牌早已經生了銹，所以盡量揸得慢一點，而且人生路不熟，還是小心一點好。

原本是要跟著一條主要幹線直接到今晚下榻的那霸新都心東橫INN，但是有一段主幹線正在維修，要轉進一條橫街，然後要面對所有大城市都有的問題:塞車。這都不是最大的問題，最頭痛係，點解個GPS自己唔識update條道既?!?!已經唔識路仲要估估下究竟要轉左定轉右加上天色開始暗都係求其找個地方停低睇下自己係邊先。

下圖左上方是那霸市的monorail單軌電動車的路軌，第一次看到十分有趣！

這就是那個可惡的日文GPS。

無論點撳撳就黎撳爆個mon都唔識update自己係邊同埋條路應該點走。最後唔知點撳reset左，好啦，終於可以再出發，不過已經六點幾加上手心冒汗，再加上心急的緣故，所以衝了兩次紅燈！天呀！我眼前只可以見到前面架車個尾燈，點解個交通燈會係上面，而唔係好似香港咁係路旁架！我第二次衝燈差D撞到前面過馬路既女人，好在我打左個sorry手勢佢又望下行人路燈証明佢自己冇錯後就施施然地走開，嚇得我，這又一次証明日本人係一個好守規矩既民族，行人路燈轉左綠就算有車來都會照過馬路 =_=

最後平平安安去到東橫INN，都係咁啦，細細間四四正正冇乜驚喜訓一晚冇乜所謂。

揀呢間酒店係因為有間大型商場在附近，滿足一下太座的逛街欲。就來七點要快D出發，不過走前比我揾到好野~

係乜來架~

神啊！原諒我吧，因為我不知道自己在做什麼！

快快快到Naha Main Place 走走吧。那裡在那霸市來說已經是一個大型商場，對我呢個大鄉里來講已收貨，不過如果你去過東京個D你都係唔好有太大期望。時間關係，DFS這天沒有去。

走到八點幾係時候醫肚啦！今晚的重頭戲係網上好評的通堂拉麵！

(那霸市金城５－４－６。電話：０９８－８５７－５５７７。營業時間：１１～２４)

揸車去好快唔使半個鐘就到，係小祿站Jusco附近。它店面在二樓而地下是一個停車場。沖繩有一樣好就係除左國際通附近好多地方泊車都係唔使錢。

點餐的話是自助的，要先到自動販賣機買餐劵，然後有侍應拿你的餐劵到廚房。麵分兩種:湯底較濃、用豬骨肴的男人麵和比較清的鹽味女人麵。由於我們到達時晚了所以女人麵已經沽清。冇法只好叫兩個男人麵(一個黑蒜另一個唔記得係乜)，再加個溏心蛋和餃子，後來唔小心撳錯制又叫多左一樣配菜。

等既時候可以任食佢地既自家制芽菜，少少辣又好爽口！剩係食芽菜都食左幾轉。

芽菜任食，都成罐攞走。

廚房是開放式的，師傅們在後面努力工作，熱情如火(因為好似真係幾熱)。

終於等到了！很好味呀！那個麵本身水準已經好好，好彈牙，更加喜出望外係那塊叉燒！點解會有一種香草味既？又軟又淋，好正！更正就係剛才唔知叫左乜，原來係五塊額外既叉燒！我開始覺得這次旅行有運行啦！

垂涎欲滴溏心蛋

原條煎的長條餃子，皮薄餡靚。係用一個超大型平底鑊原條煎的。

細細隻一啖啱啱好。餃子底部有些少焦，可口非常。

食到飽飽連湯都飲唔晒。快快返酒店明天要來去藍洞大冒險！希望唔好落雨啦...

上篇︰沖繩自駕遊 - 準備

下篇︰沖繩自駕遊 - Day 2 (一)